Anak ni-rape, misis initak

BULACAN, Philippines – Kalaboso ang binagsakan ng isang 47-anyos na mister matapos halayin ang sariling anak at itakin ang kanyang misis sa Barangay Tigpalas sa bayan ng San Miguel, Bulacan kamakalawa ng gabi. Pormal na kinasuhan ang suspek na si Arturo Mendoza habang ginagamot naman sa ospital ang misis nitong si Susana Valle at anak na 14-anyos, pawang nakatira sa nabanggit na barangay. Sa ulat na isinumite ni P/Supt. Jesus Reyes kay P/Senior Supt. Fernando Mendez Jr. lumilitaw na naaktuhan ng misis ang ginawang maitim na balak ng suspek sa kanyang anak na babae sa loob ng kanilang kuwarto. Dito na kumuha ng itak ang suspek at tinaga sa ulo ang kanyang misis. Nakahingi naman ng tulong ang mag-ina sa ilang opisyal ng barangay kaya naaresto ang suspek.