Kidapawan City ,Philippines – Pinagbabaril hanggang sa mapatay ang ginang na pinagbibintangang mangkukulam ng motorcycle riding in tandem habang namimitas ng gulay sa kanilang bakuran sa Makilala, North Cotabato kamakalawa.
Idineklarang dead on arrival sa Makilala Medical Specialist Hospital ang biktimang si Beanita Merced sa tinamong mga tama ng bala ng shotgun sa ulo at dibdib.
Bandang alas-5:30 ng hapon ng sumulpot sa Brgy. Malungon, Makilala ang mga armadong salarin na lulan ng motorsiklo at pagtapat sa biktima ay pinagbabaril ito.
Si Merced ay pinararatangang mangkukulam na umano’y siyang may kagagawan ng pagkamatay ng isang opisyal ng kanilang barangay pero ayon sa mga doktor ay sakit sa puso ang ikinasawi nito.
Nabatid na bago ang insidente ay nakatanggap ng mga pagbabanta sa kaniyang buhay ang biktima.
Patuloy ang imbestigasyon sa kaso kabilang ang anggulo ng alitan sa lupa sa sinisilip na motibo sa krimen.