CAMARINES NORTE, Philippines — Kalaboso ang dalawang kalalakihan na pinaniniwalaang nagpapakalat ng bawal na droga makaraang maaresto ng pulisya at ilang opisyal ng barangay sa isinagawang buy-bust operation sa Barangay Tugos sa bayan ng Paracale, Camarines Norte kamakalawa ng hapon. Pormal na kinasuhan ang mga suspek na sina Anwar Jacarta, 18; tubong Datu Paglas, Maguindanao at Gerund Encinas, 32, ng Purok 1, Brgy. Tugos sa nasabing bayan. Nasamsam sa mga suspek ang P.4 milyong halaga ng 6-plastic sachet ng shabu at ilang gramo ng pinatuyong dahon ng marijuana. Sa ulat ni P/Senior Supt. Antonio Gardiola Jr. provincial PNP director, ipinapalaman sa tinapay ang shabu at marijuana para 'di-mapansin ng mga awtoridad ang kanilang modus operandi. Sa tulong ng ilang impormante ay naaresto ang mga suspek drug pusher sa bayan ng Paracale.