MANILA, Philippines - Tatlo-katao ang iniulat na nasawi habang pitong iba pa ang nasugatan makaraang araruhin ng military truck ang limang bahay sa Barangay Bacolod sa bayan ng Parang, Maguindanao kamakalawa ng gabi.
Kabilang sa mga namatay ay miyembro ng pamilya Ito na sina Idang, 45; Harija, 18; at si Amad Ito; 16, habang sugatan naman sina Bailyn Mamander, Adrian Mamander, Johair Mamander, Nody Mamander, Sukamo Makabago at dalawang iba pa na isinugod sa Cotabato Regional Hospital.
Ayon kay Lt. Col. Noel de la Cruz, hepe ng Civil Military Operations ng Army’s 6th Infantry Division, patungong Sultan Kudarat mula sa Marawi City ang M35 truck ng Army’s 65th Infantry Battalion para magdala ng relief goods sa naapektuhan ng tubig-baha nang mawalan ng preno.
Nawalan ng control sa manibela si Sgt. Revelino Torres kaya nag tuluy-tuloy na inararo ang mga kabahayan sa gilid ng highway kung saan nadamay din ang sasakyang nakaparada.