MANILA, Philippines - Nasagip ng tropa ng militar ang 3 bata na ginawang mandirigma ng mga rebeldeng New People’s Army habang dalawa pang rebelde ang iniulat na napaslang sa panibagong bakbakan sa liblib na bahagi ng Barangay Pungon sa bayan ng San Agustin, Surigao del Sur kamakalawa.
Kinilala ng tagapagsalita ng Army’s 4th Infantry Division na si Major Eugenio Osias IV ang mga nasagip na bata na sina Reynaldo Jimenez, 12; Robert Jimenez, 10; at si Jefferson Galdiano, 10, pawang nirekrut ng grupo ni Alyas Ka Michi ng Guerilla Front 19 B NMRC para magtanim ng landmine laban sa tropa ng pamahalaan.
Tumagal ng halos isang oras ang bakbakan na ikinasawi ng dalawang rebelde na nakuha ang bangkay sa encounter site gayundin ang mga landmine habang wala namang iniulat na nasugatan o kaya nasawi sa panig ng militar.