Magsasaka, mangingisda itinumba

CAMP SIMEON OLA, Legazpi City, Philippines – Dalawa-katao ang iniulat na napaslang sa magkahiwalay na karahasan sa dalawang bayan sa lalawigan ng Masbate kamakalawa. Si Virgilio Alto, 48, magsasaka ay pinagbabaril hanggang sa mapatay ng mga rebeldeng New People’s Army habang papalabas sa kanyang bahay sa Barangay Bonbon sa bayan ng Milagros, Masbate. Samantala, si Rodel Abacano, 41, mangingisda, ay pinagsasaksak ng kanyang kabarong mangingisda na si Allan Laurio, 34, sa dalampasigan ng Barangay Guindahap sa bayan ng Monreal. Ayon sa pulisya, nainsulto at napikon ang suspek na sinasabing nasagi ng lubid ng angkla ang kanyang bangka kung saan pinagtawanan naman ng biktima. Nabatid na hinamon ng suntukan ng suspek ang biktima subalit hindi nito pinatulan kaya naganap ang pananaksak.