Councilor tiklo sa extortion
CAMP VICENTE LIM, Laguna, Philippines – Kalaboso ang binagsakan ng isang municipal councilor matapos arestuhin sa kasong extortion at grave threat laban sa babaeng negosyante kamakalawa ng hapon.
Kinilala ni P/Senior Supt. Edwin Nemenzo, hepe ng Region 4A- Criminal Investigation and Detection Group ang suspek na si Councilor Marlon Acaylar, 39, ng Pangil, Laguna.
Sa police report, naaresto si Acaylar dahil sa reklamong inihain ng negosyanteng si Pricilla Organista ng Candelaria St. Barangay Balian sa nasabing bayan.
Sa salaysay ni Organista, sinasabing humihingi si Acaylar ng P200,000 para hindi nito dukutin ang babaeng anak ng negosyante.
Dahil dito, humingi ng tulong si Organista sa pamunuan ng CIDG Laguna kaya inilatag ang entrapment operation laban sa suspek.
Naaresto si Acaylar sa bisinidad ng Sun Star Mall matapos nitong tanggapin ang P17,500 marked money mula kay Organista bilang paunang bayad.
Kasalukuyang nakapiit si Acaylar sa Laguna CIDG office para harapin ang kasong extortion at grave threats.
- Latest
- Trending
