Manila, Philippines - Nagbuwis ng buhay ang bagitong pulis matapos maaktuhan ng tatlong kidnaper na miyembro ng teroristang Abu Sayyaf Group na tinitiktikan nito kaugnay sa pinagtataguan sa Tsinoy trader sa kagubatan ng Patikul, Sulu kamakalawa.
Kinilala ang napaslang na si PO1 Cesar Dammang, 42, intelligence operative sa himpilan ng pulisya sa bayan ng Jolo, Sulu.
Narekober ang bangkay ng biktima bandang alas-8 ng gabi matapos na magresponde ang mga pulis-Jolo sa bahagi ng Sitio Dan Puti sa Brgy. Liang, Patikul na itinuro ng mga residente na pinagmulan ng mga putok ng baril.
Lumilitaw na nagtungo sa nasabing barangay si Dammang upang tiktikan ang grupo ng Sayyaf na may hawak sa bihag na si Nelson Lim, restaurant owner na dinukot noong Abril 29 sa bayan ng Patikul.
Dito naman natiyempuhan ang biktima matapos mamataan ng tatlong kidnaper na mga bantay sa dinukot na Tsinoy kaya kaagad na niratrat kung saan kinuha pa ang service firearm nito.