Rapist ng anak, nagbigti

CABANATUAN CITY, Nueva Ecija, Philippines -  Pinaniniwalaang nakonsiyensya ang isang 58-anyos na ama na humalay sa kanyang anak na babae kaya nagdesisyong magbigti sa loob ng palikuran ng ospital sa Cabanatuan City, Nueva Ecija noong Lunes ng umaga. Kinilala ng pulisya ang nag-suicide na si Ricardo Lembo ng Barangay District 6 sa bayan ng Cuyapo, Nueva Ecija. Ayon kay PO1 Renato Tuazon, dinakip si Lembo sa kasong panghahalay sa sariling anak subalit nanlaban kaya binaril sa paa. Kaagad naman isinugod sa Dr. Paulino  J. Garcia Memorial Research and Medical Center subalit habang ginagamot ay nagpaalam kay PO1 Tuazon si Lembo para umihi. Dahil sa ilang minuto na ang nakalipas na hindi pa lumalabas si Lembo ay puwersahang binuksan ang pintuan ng palikuran at bumungad ang nakabiting katawan ng biktima.