BATANGAS, Philippines - Dalawang escort ng isang bokal sa Cavite ang naaresto ng pulisya dahil sa pagdadala ng baril sa bayan ng Talisay, Batangas kamakalawa ng umaga. Kinilala ni P/Supt. Arcadio Ronquillo, PIO ng Batangas PNP ang mga suspek na sina Juvel Manalo, 28, ng Amadeo, Cavite at Danny Brillantes, 37, ng Negros Occidental, kapwa bodyguard ni Bokal Alberto Ambagan ng 6th District sa Cavite. Ayon sa police report, naglalakad ang mga suspek sa loob ng palengke ng Talisay sa Zone 6, Barangay Poblacion na kapwa may nakasukbit na baril sa bewang kaya ipinagbigay-alam ng taumbayan sa pulisya. Nakumpiska sa mga suspek ang Magnum 357, calibre 38 revolver at mga bala na sinasabing walang kaukulang papeles. Napag-alaman din na may standing warrant of arrest si Brillantes sa kasong kriminal sa bayan ng Alaminos, Laguna at murder sa Tagum City, Davao.