RIZAL, Philippines — Isang 61-anyos na bakasyunistang Hapones ang iniulat na nasawi makaraang mabundol ng owner-type jeep sa bahagi ng Sitio Dalig, Barangay Bagumbayan sa bayan ng Pililla, Rizal kamakalawa ng hapon. Hindi na umabot ng buhay sa Pililla Medicare Hospital si Mamaru Iwawaki na pansamantalang nanunuluyan sa A. Mabini Street, Brgy. Quisao sa nasabing bayan. Arestado at pormal na kakasuhan ang drayber ng stainless owner-type jeep (DKT-652) na si Aldrin Albos, 37, may-asawa, ng Sitio Libis, Brgy. Bombongan sa bayan ng Morong.
Sa ulat ng Rizal Police Provincial Office (RPPO), naganap ang aksidente dakong alas-4:45 ng hapon sa National Road, Sitio Dalig, Brgy. Bagumbayan. Nabatid na lulan ng motorsiklo (TS-8144) si Iwawaki nang mahagip ng sasakyan ni Albos. Naipagbigay-alam na sa Japan Embassy ang naganap na insidente.