MANILA, Philippines - Isang 28-anyos na misis na sinasabing tumangging makipagbalikan sa kaniyang mister ang kinidnap sa kahabaan ng Quezon Boulevard, Lamitan City, Basilan kamakalawa. Kinilala ang kinidnap na misis na si Shayen Sabdani ng Sitio Kapengcongan, Barangay Sta. Clara sa nasabing lungsod. Inireklamo naman ng pamilya ng misis ang suspek na si Jumlaton Uddin ng Tipo-Tipo, Basilan. Sa ulat ng pulis-ARMM, naganap ang kidnapping sa harapan ng Mindanao Autonomous College Foundation Inc. bandang alas -10 ng umaga. Nabatid na mamimili sana ang biktima lulan ng motorsiklo (7578 JE ) na minamaneho ng kanyang kapatid na si Norman Sabdani nang kaladkarin ng suspek patungong bayan ng Mohammad Ajul, Basilan.