Gasoline station hinoldap

CAINTA, RIZAL ,Philippines  —  Limas ang kinita ng isang gasoline station matapos na holdapin ng dalawang holdaper sa bayang ito kahapon ng madaling araw. Hindi pa mabatid kung magkano ang halagang natangay ng mga suspek na nagkunwaring mga kostumer  mula sa Belfast Power Gasoline and Service Center na matatagpuan sa Imelda Avenue, Brgy. Sto. Domingo, Cainta, Rizal. Batay sa ulat ng Cainta Police Station, dakong alas-12:10 ng hatinggabi nang maganap ang insidente, kung saan nagkunwari umanong mga kostumer ang mga suspek, na nakasakay sa isang taxi na puting Toyota Vios, na hindi nakuha ang plaka. Habang nagpapakarga, bigla na lamang umanong naglabas ng baril ang mga suspek at tinutukan ang kaherong si Michael Magracia, gayundin ang gasoline boy na si Raymundo Dado, na siyang inutusang kumuha ng pera mula sa kaha.