MANILA, Philippines - Apat na security guard ng Del Monte Philippines ang iniulat na minasaker ng mga rebeldeng New People’s Army kung saan himalang nakaligtas ang dalawa na ngayon ay nakikipaglaban kay kamatayan sa naganap na paghahasik ng lagim sa plantasyon ng pinya sa Barangay Dalwangan, Malaybalay City, Bukidnon kamakalawa.
Kinilala ni Major Eugenio Julio Osias, chief ng 4th Civil Military Operations ng 4th Infantry Division ang dalawa na sina Tito Yecyec at Ronilo Madrid na kapwa pawang miyembro ng Padlas Security Agency na nakatalaga sa Del Monte Philippines.
Kasalukuyang nakikipagbuno kay kamatayan sina Warlito Seigura at Antonio Alambitin.
Bandang alas-7:45 ng umaga habang lulan ng patrol car ng Del Monte Pineapple Plantation ang mga security guard nang ratratin sa bahagi ng Atugan Bridge.
Tinangay pa ng mga rebelde ang dalawang M16 Armalite rifles, shotgun, cal. 38 revolver ng mga sekyu.
Namataang tumahak ang mga rebelde patungo sa direksyon ng Zone 5, Bayong Road sa bayan ng Impasug-ong lulan ng kulay asul na multicab.
Pinaniniwalaang naghiganti ang mga rebelde laban sa may-ari ng kompanya dahil sa hindi pagbibigay ng revolutionary tax.