Ex-vice mayor itinumba

MANILA, Philippines - Patay ang isang dating bise alkalde ng Claveria, Masbate makaraang pagbabarilin sa kanyang bahay sa Sta. Rosa City, Laguna kamakalawa ng gabi. Apat na bala ng baril ang tumama sa katawan ni Joseph Magallanes na binawian ng buhay habang ginagamot sa Mt. Sinai  Hospital. Sa ulat na nakarating kay P/Supt. Ismael Fernandez, bandang alas-6 ng gabi nang maganap ang krimen sa Buena Perla Subdivision sa Brgy. Las Labas. Lumilitaw na sumilip sa gate ng tahanan ng biktima ang gunman kung saan naiwang nakabukas ang unahang pintuan. Sunud-sunod na putok ang umalingawngaw na sumapul sa katawan ng biktimang nanonood ng telebisyon. Nabatid na simula noong May elections ay nakatanggap ng death threats ang biktima kaya napilitan ang pamilya nito na manirahan sa Sta. Rosa City.