MANILA, Philippines - Apat-katao ang iniulat na nasawi habang aabot naman sa 24 ang nasugatan makaraang sumalpok sa punongkahoy at bumaligtad ang isang pampasaherong bus sa kahabaan ng highway sa Ayala North Point sa Brgy. Matab-ang sa Talisay City, Negros Occidental kamakalawa ng umaga. Kinilala ang mga namatay na sina John Gallenero, 44; Myrna Octavio, 48; Leopolda Parcon at Rogelio Plame. Nasa Riverside Medical Center, Bacolod Doctor’s Hospital at Western Visayas Regional Hospital ang mga sugatang pasahero. Lumilitaw na tinangka ng driver ng Pao-Pao Lines na mag-overtake sa sinusundang bus sa pakurbadang highway subalit namiskalkula kaya sumalpok sa malaking puno sa gilid ng highway.