GAPAN CITY, Nueva Ecija, Philippines — Pinaghahanap ng pulisya ang isang babaeng nakapagsangla ng 20-sasakyan na kanyang hiniram sa iba’t ibang may-ari sa Gapan City, Nueva Ecija. Ayon kay P/Supt. Ricardo Villanueva, hepe ng Gapan City police, aabot 20 sasakyan ang naisangla ng suspek na si Evangeline Protacio na sinasabing walang tiyak na tirahan. Lumilitaw sa modus operandi ni Protacio na umaarkila ng sasakyan sa halagang P30,000 kada buwan subali’t lingid sa kaalaman ng may-ari ay kaagad na isinasangla gamit ang pekeng special power of attorney at sa interest na 5% kada buwan. Napag-alamang tatlong residente na nakakuha ng sanglang sasakyan mula sa suspek ay boluntaryong nagsauli sa takot na sila ang makasuhan ng tunay na may-ari. Patuloy naman ang imbestigasyon ng mga awtoridad.