MANILA, Philippines - Isang wanted na pinaniniwalaang responsable sa pagpatay sa dating environmentalist Officer ang napatay matapos makipagbarilan sa mga operatiba ng pulisya sa Matina Crossing, Davao City kamakalawa. Kinilala ang napatay na si Neptali “Jade” Artista na may kasong 3 counts of murder sa pamamaslang kay ret. Col. Eulogio Baltazar ng Davao Oriental at dalawa pa nitong kasamahan. Si Artista ay nasabat ng grupo ni P/Senior Inspectors Jacy Jay Francia at Randolph Cabañog sa Nabua Compound sa bahagi ng Matina Crossing. Lumilitaw na nag-warning shot ang pulisya subalit tumangging sumuko ang suspek kung saan naunang nagpaputok ng baril sa arresting team ng pulisya na may warrant of arrest kaya nauwi sa shootout. Narekober sa pinangyarihan ng shootout ang Intratec 9 MM pistol, submachinegun na may 200 rounds ng bala at cal. 40.