3 alkalde kasabwat sa smuggling: P54-milyong kontrabandong ginto nasabat

BAYOMBONG, Nueva Vizcaya, Philippines – Tinatayang aabot sa P54 milyong tole-tolenadang mine tailings at mga raw mineral na pinani­niwalaang tangkang ipuslit palabas ng nabanggit na lalawigan ang nasabat ng pulisya sa inilatag na check­point sa Barangay Magsay­say sa bayan ng Bayom­bong, Nueva Vizcaya no­ong Linggo ng tanghali.

Ayon sa pulisya, ang kontrabando na nagtatag­lay ng ginto, tanso at manganese ay nakalagay sa loob ng 20-wheeler na truck na may plakang BUB 698 na sinasabing patungong Maynila nang maharang sa checkpoint sa pangunguna nina P/Supt Melchor Ca­balza at Danilo Fernandez ng Environment Natural Resources Office.

Sa ulat ni P/Senior Supt. Elmer Beltejar, umaabot sa 40 tonelada (40,000 kilograms) ang kontrabando ay pinaniniwalaang ipinagbibili sa ibang bansa sa halagang US$30 kada kilo na mala­yong mas mataas kumpara sa P30 per kilo na ibina­bayad sa mga local miner.

Base sa isiniwalat ng source, tatlong alkalde at ilang opisyal ng pulisya na pansamantalang hindi ibi­nunyag ang mga pangalan ang nasa likod ng iligal na transportasyon at pagmi­mina sa Barangay Didipio ng Kasibu at Runruno, Quezon.

Naunang inatasan ni Nueva Vizcaya Gov. Luisa Lloren Cuaresma ang ka­pulisan at environment personnel na arestuhin ang mga nagpupuslit ng mine tailings maging ang mga iligal na minero sa mga minahan sa buong la­lawigan.