BALIWAG, Bulacan, Philippines —Himalang nakaligtas ang isang kapitan ng baran gay sa bayang ito matapos siyang makipagpalitan ng putok sa dalawang armadong lalaki kamakalawa ng gabi.
Ayon kay Senior Supt. Fernando Villanueva, Bulacan provincial police director, ang biktima ay nakilalang si Bernard Gonzales, bgy. chairman ng Brgy. Tangos sa bayang ito.
Minamaneho ng biktima ang kanyang motorsiklo bandang alas-11:45 kamakalawa ng gabi ng bigla siyang pagbabarilin ng 2 kalalakihan na lulan din ng motorsiklo.
Kahit sugatan, nagawa ng barangay official na makipagpalitan ng putok sa mga suspek kaya mabilis na tumakas ang mga tumambang dito.
Isinugod naman sa Sagrada Familia hospital ang biktima at inilipat sa pagamutan sa Maynila at nasa ligtas ng kalagayan. May hinala ang pulisya na pulitika ang motibo sa tangkang pamamaslang sa opisyal ng barangay.