MANILA, Philippines - Anim katao kabilang ang isang municipal councilor ang nasugatan makaraang sumalpok sa paanan ng bundok sa tabi ng matarik na highway ang sinasakyan ng mga itong Elf truck sa Bauko, Mt. Province nitong Huwebes.
Kinilala ni Sr. Supt. Leon Talleo, Spokesman ng Police Regional Office-Cordillera ang mga biktima na sina Dominic Abnasan, 9 anyos; Jacob Cabradilla, 1- anyos; Feliciano Ipawan, 45-anyos, PO3 Joan Alipio, Jimmy Cabradilla, 32-anyos at Bernard Cabradilla, 44-anyos, Municipal Councilor sa bayan ng Adams, Ilocos Norte.
Ang mga biktima ay kasalukuyang nilalapatan ng lunas sa Luis Hora Regional Hospital.
Ayon sa ulat, bandang alas-5:00 ng hapon habang pababa sa matarik na highway ang isang Elf truck sa Sitio Ampengke, Brgy. Leseb, Bauko na sinasakyan ng may 15 katao kabilang ang mga biktima ng magluko ang preno nito at sumalpok ito sa paanan ng bundok sa tabi ng highway hanggang bumaligtad ang truck na pag-aari ng konsehal.
Patungo sana ang mga ito sa isang burol ng kamag-anak ng mangyari ang aksidente.