MANILA, Philippines - Halos natusta ang katawan ng isang Kano habang isa pa ang nasugatan makaraang masunog ang isang bahay sa subdibisyon sa Brgy. Taculing, Bacolod City kahapon ng madaling-araw. Kinilala ang nasawi na si France Sharp, 87, ng Royal Palm Subdivision habang ginagamot naman sa Bacolod Doctor’s Hospital ang sugatang si Marie Stephanie Villanueva, 22, na nagtangkang sumagip kay Sharp pero nabigo. Sa ulat na nakarating sa Camp Crame, nagsimula ang apoy sa kuwarto ni Marie na anak ni Michael Villanueva. Tinatayang aabot sa P1milyong halaga ng ari-arian ang tinupok ng apoy. Lumilitaw naman sa inisyal na imbestigasyon na faulty electrical wiring ang pinagmulan ng sunog.