5 van sinunog ng NPA

MANILA, Philippines - Tinatayang aabot sa milyong halaga ng ari-arian ang nawasak matapos na sunugin ng mga rebeldeng New People’s Army ang limang container van na pag-aari ng DOLE/Stanfilco sa Compostela Valley kamakalawa. Sa ulat ng Police Regional Office 11 na nakarating sa Camp Crame, hinarang ng mga rebelde ang limang sasakyan na papasok sana ng compound ng DOLE/Stanfilco sa Purok 20, Brgy. Camanglangan, New Bataan. Walang nagawa ang mga bantay, kawani at trabahador ng plantasyon sa mga armadong rebelde kung saan agad na binuhusan ng gasolina ang mga container van. Nagsitakas ang mga rebelde patungo sa direksyon ng Sitio Pantuayan, Barangay Tandawan. Sinasabing pa­ngingikil ang isa sa motibo ng panununog.