BATAAN, Philippines — Napaaga ang salubong ni kamatayan sa isang hayskul student at kasambahay nito makaraang gilitan at pagnakawan ng mga miyembro ng Akyat-Bahay Gang sa Barangay Maria Fe sa bayan ng Orani, Bataan kamakalawa ng umaga. Kinilala ang mga napaslang na sina Cyril Jasper de Taban, 13, 2nd year high school sa Queen Mary High School at Eien Bequin, 23, kasambahay ng pamilya Taban. Sa ulat na nakarating kay P/Senior Supt. Arnold Gunnacao, dakong alas-9 ng umaga nang matagpuan ang bangkay ni Cyril sa loob ng tahanan habang ang katawan ni Bequin ay nasa likuran ng bahay.
Ayon kay PO2 Francis Francisco, nawawala ang laptop at digital camera ni Cyril kung saan iniwan ang cell phone nito. Si Cyril ay naging assistant sacristan ni Father Joshue Erana ng Nuestra Señora Catholic Church mula Grade1 hanggang Grade 6 sa Holy Rosary Parochia School.