MANILA, Philippines - Isang tauhan ng Philippine Air Force (PAF) ang nasawi habang dalawa pa nitong kasamahan ang nasugatan makaraang tambangan ng mga pinaghihinalaang miyembro ng mga rebeldeng New People’s Army (NPA) sa bayan ng Calaca, Batangas kamakalawa.
Idineklarang dead-on-the spot si Airman 1st Class Darwin Roxas habang isinugod naman sa Maddona Hospital sa Balayan, Batangas ang mga sugatang sina Airman 2nd Class (A2C) Rommel Tiosion at Airman 2nd Class Aaron Manalo. Ang nasabing mga sundalo ay pawang miyembro ng 730th Special Operation Group (SOG) ng PAF na nakabase sa Barangay Coral, Lopez ng lalawigang ito.
Bandang ala-1 ng hapon nitong Huwebes ng mangyari ang pananambang sa mga biktima habang lulan ang mga ito ng motorsiklo na bumabagtas sa kahabaan ng highway ng Brgy. Calantas, Calaca ng tambangan ng mga armadong rebelde.
Nabatid na nakasibilyan ang nasabing mga sundalo nang mangyari ang pananambang kasabay ng pagkondena sa insidente.
Nagpapatuloy naman ang hot pursuit operations laban sa grupo ng mga rebelde na responsable sa pananambang.