STA. MARIA,Bulacan, Philippines — Dinakip ng mga tauhan ng Sta. Maria-PNP ang isang retiradong pulis na inireklamo ng pangmomolestiya ng isang tatlong taong gulang na bata sa Brgy.Mag-asawang Sapa sa bayang ito kahapon.
Sa bisa ng Warrant of Arrest na ipinalabas ni Hon. Judge Ma.Victoria Fernandez-Bernardo ng RTC Br.18 sa Malolos City inaresto ang suspek na si SPO3 Reynaldo del Rosario, 64; at residente ng El Pueblo Subdivision, Bgy. Mag-asawang Sapa, Sta. Maria, Bulacan dakong alas-3:20 kamakalawa ng hapon.
Ayon kay P/Supt.Marcos Rivero posibleng inakala ng suspek na hindi nagsampa ng reklamo ang biktima dahil anim na buwan ang nakaraan bago inilabas ang warrant laban sa huli.
Base naman sa imbestigasyon ni PO3 Ma.Cecilia Discartin ng Womens and Children Complaints Desk naganap ang pagmomolestiya sa biktima noong Disyembre 23, 2009 habang naglalaro ang biktima.
Dito ay tinawag ng suspek ang biktima at agad na ipinasok sa loob ng kanyang bahay at umano’y pinaghahalikan sa iba’t ibang parte ng katawan saka pinasok ang daliri sa ari ng paslit.
Nabisto lang ang pagmomolestiya sa biktima ng mapansin ng kanyang ina na may bahid ng dugo ang panloob na damit ng biktima at nang tanungin ito ay agad ding isinalaysay ang pangyayari sa kanya at kung sino ang may kagagawan saka naghain ng reklamo sa pulisya.