MANILA, Philippines - Nangidnap uli ang mga armadong lalaki matapos na dukutin ang isang 60-anyos na negosyante sa Zamboanga City kahapon ng umaga. Kinilala ni P/Senior Supt. Edwin Deocampo, ang panibagong dinukot na si Vicente “Teng” Barrios. Lumilitaw na hinarang ng mga kidnaper na lulan ng dalawang pumpboat ang sinasakyang pumpboat ng biktima sa karagatan ng Brgy. Bolong. Naganap ang pagdukot sa biktima, isang araw matapos na masagip ng pulisya at militar ang Filipino-Swiss na si Charlie Reith sa Brgy. Labuan noong Miyerkules. Ang insidente ay ini-report sa mga awtoridad ng operator ng bangka na sinasakyan ni Barrios na papasok sana sa kaniyang trabaho bilang marine caretaker sa isla ng Zamboanga.