Van hulog sa bangin: 3 patay

BULACAN, Philippines — Tatlo-ka­tao ang kumpirmadong na­matay habang labintatlong iba pa ang nasugatan ma­karaang mahulog ang van sa may 250 metrong lalim na bangin sa bisinidad ng Sitio Bitbit, Brgy. San Mateo, sa bayan ng Norzagaray, Bulacan ka­hapon.

Nasawi sina Isagani Ocam­­po Sr., Carmelita Bu­sa, at Priscilla Restituto ha­bang sugatan naman sina To­mi­yasu Koichi, Angelito Quisi­quisi ng Brgy. Nueva, San Pedro, Laguna; Narcisa Ocam­po, Isagani Ocampo Jr., Isagani Ocampo lll, Isa­gani Ocampo lV, Michael Bu­san, 4; Reyna Mae Cal­deron 4; Maritess Busan, 11; Rica Calderon, 2; Ryan Cal­deron, 5; Reymar Calderon, 7; at si Reychel Calderon, 10, pa­wang nakatira sa Brgy. Dagat-Dagatan, Ca­lo­ocan City at Malabon City.

Sa ulat na nakarating kay P/Supt. Bruno Viola Jr., patungong Bitbit River para mag-eskursiyon ang mga biktimang lulan ng van (BDB 995) nang mawalan ng kon­trol sa manibela ang drayber na si Quisiquisi pagsapit sa nabanggit na sitio.

Lumilitaw sa imbesti­gasyon na hindi kabisado ng drayber ang mga kurba­dang daan patungo sa Bitbit River na nagresulta sa trahedya.