MANILA, Philippines - Lima-katao ang na-ospital matapos na malason sa kinaing ice cream sa Island Garden City of Samal, Davao del Norte kamakalawa. Kabilang sa mga naisugod sa ospital ay sina Jessie Verdarela, 16; Frederick Laconde, 14; Francisco Peronte, 55; Sussie Laconde, 29; at si Mindanao Laconde, 56.
Sa police report na nakarating sa Camp Crame, lumilitaw na dumalo ang mga biktima sa pagtitipon sa Island Garden City of Samal kung saan kumain ng ice cream na kabilang sa inihanda sa nasabing okasyon. Gayon pa man, matapos makapagmeryenda ay magkakasunod na nakaranas ng pananakit ng tiyan, pagsusuka, pagkahilo kaya’t mabilis na isinugod sa pagamutan.
Sa inisyal na imbestigasyon, natuklasan na expired na ang kinain na ice cream sa handaan.