BULACAN, Philippines — Hindi na maipagpapatuloy ng tatlong mag-uutol ang kanilang pag-aaral sa nalalapit na pasukan makaraang malunod magkakasunod sa malalim at maburak na tibagan ng bato (quarry site) sa Barangay Caysio sa bayan ng Sta. Maria, Bulacan kahapon.
Kinilala ni P/Supt. Marcos Rivero ang mga nasawi na sina Jennifer Abuan, 14; Mariano Abuan, 12; at si Jecca Mae Abuan, 9, pawang nakatira sa Barangay Kaypombo.
Huling namataang buhay ang tatlo na kasama ang kanilang kalarong sina Jerome at Lyzette na namumulot ng panggatong malapit sa nabanggit na quarry site matapos magpaalam sa kanilang mga magulang.
Lumilitaw sa pagsisiyasat na habang binabaybay ng mga bata ang gilid ng hukay na may tubig sa quarry site nang madulas at mahulog sina Jennifer at Jecca Mae matapos magbiruan
Sinaklolohan naman ni Mariano ang kanyang dalawang kapatid bago tumalon at dahil mga ‘di-marunong lumangoy ay tuluyan na itong nilamon ng tubig na ang ilalim ay burak.
Agad namang tumakbo pabalik sa bahay sina Jerome at Lyzette upang humingi ng tulong sa kanilang mga magulang subalit hindi na naisalba pa sa tiyak na kamatayan ang tatlong mag-uutol.
Sa tala ng pulisya, umaabot na sa anim na kabataan ang nalulunod sa nabanggit na quarry site na posibleng muling maulit kapag hindi umaksyon ang kinauukulang ahensya ng lokal na pamahalaan.