KIDAPAWAN CITY, Philippines —Patay ang isang hinihinalang holdaper habang sugatan ang isa sa mga kasamahan nito matapos makipagbarilan sa mga sundalo at pulis na nakatunog sa balak nilang pangho-hold-up sa isang restaurant sa Poblacion ng Pikit, North Cotabato, alas-4:30 kamakalawa ng hapon.
Kinilala ni Lt. Col. Domingo Gubuay, commander ng 7th Infantry Battalion, ang napatay na suspect na si Teng Tado habang sugatan naman si Deng Tado na kapwa miyembro ng Armed Lawless Group (ALG) na nag-o-operate sa bayan ng Pikit at iba pang lugar sa North Cotabato.
Arestado din ang iba pang kasama ni Teng na sina Kennedy, Bedo, Mamadatu, Bagutay at Mosaiden Magao at isang Toks Dalgan.
Ayon sa report, naispatan ng isang informant ang presensiya ng mga suspect sa Geonette Restaurant na nasa Poblacion ng Pikit na planong holdapin ng grupo. Agad namang itinawag ito sa PNP at sa 7th IB na nasa lugar.
Subalit agad na pinaputukan ng mga suspect ang mga sundalo at pulis na nauwi sa palitan ng putok.
Nagsasagawa pa rin ng imbestigasyon ang pulisya laban sa mga suspect habang ginagamot si Deng sa Cruzado Medical Hospital sa bayan ng Pikit.