MANILA, Philippines - Anim katao ang namatay habang 19 pa ang sugatan nang mahulog sa bangin sa Buguias, Benguet kamakalawa ng hapon ang isang pick-up truck makaraang mabagsakan ito ng isang malaking tipak ng bato.
Kinilala sa ulat ng pulisya ang mga nasawi na sina sina Lorenta Talio, Floro Wayan, Lolit Puwakan, Lito Vilmor Puwakan, Joan Maliones at Noel Talio.
Kasalukuyan namang nilalapatan ng lunas sa Lutheran Church Hospital ang 19 mga sugatang biktima.
Naganap ang sakuna sa kahabaan ng matarik na highway ng Sitio Sebang, Barangay Abatan, Buguias, Benguet dakong alas-3:35 ng hapon.
Ayon kay Buguias Police Chief Senior Inspector Johnson Bantog, may 25 katao ang lulan ng Series 5 pickup na pawang magkakamag-anak na galing sa Barangay Loo, Buguias matapos na dumalo sa isang family reunion at pauwi na sa Kabayan, Benguet nang sapitin ang trahedya.
Bigla na lamang gumulong ang isang malaking tipak na bato galing sa bundok na sa kamalasan ay bumagsak sa pickup na gumulong naman hanggang sa mahulog sa bangin.