Comelec office sinunog

BULACAN, Philippines – Pinani­niwalaang maaapek­tuhan ang eleksyon sa bayan ng Obando, Bulacan makara­ang sunugin ng mga ‘di-pa kilalang lalaki ang opisina ng Commission on Elections (Comelec) na nasa loob ng munisipyo ng na­banggit na bayan noong Lunes ng gabi.

Sa ulat ng provincial fire marshal na si Supt. Ab­salom Zipagan, nagsimula ang sunog bandang alas-11:15 ng gabi at naapula naman makalipas ang 30-minuto.

Nadamay sa sunog ay certified voters list (CVL), voters registration report (VRR), maha­halagang do­ku­mento na may kaug­nayan sa May 10 elections at mga sample ballot para sa isasagawang mock elections. Bago su­miklab ang apoy, nabatid na nasa opisina pa ang tatlong kawani ng Comelec ka­bilang na si Election As­sistant ll Enriqueto San Diego­ kung saan magkaka­sabay na umalis.

Sa ulat na natanggap ni P/Senior Supt. Fer­nando Villanueva, acting provincial police director, dala­wang ’di-pa nakikilalang lalaki na lulan ng motorsiklo ang umaaligid sa nabang­git na lugar.

Nabatid na namataan ang dalawa na bumaba ng motor­siklo saka nagmama­daling umalis. Natagpuan ng pulisya ang dalawang maliit na plastic container na sina­sabing may kemikal na ginamit sa panu­nunog.

Kasalukuyan pang ini­im­bestigahan ng mga ta­uhan ni P/Chief Insp. Julius Caesar Mana ng CIDT-Bulacan ang tatlong tauhan ng Comelec na napag-alamang nagtrabaho sa opisina ng hatinggabi bago naganap ang sunog.

Kaugnay nito, tiniyak naman ni Atty. Sabino Me­ja­rito, election super­visor na walang epekto ang na­ganap sa sunog sa da­ra­ting na halalan dahil may mga kopya sila ng nasunog at naba­sang mga doku­mento.