KAMPO ALEJO SANTOS, Malolos City, Philippines — Isang kagawad ng Phillipine Air Force at isa pang lalaki ang kapwa nasawi sa panibagong insidente na kinasasangkutan ng motorsiklo sa magkahiwalay na lugar kamakalawa ng hapon.
Kinilala ang mga nasawi na sina Airforce 2nd Class Luisito Cruz, 26, may-asawa, residente ng Barangay Poblacion sa bayan ng Bustos.
Nakilala rin ang isa pa na si Reynaldo Fajardo, 30, may-asawa, residente ng Barangay San Jose Patag sa bayan ng Sta. Maria.
Papauwi na ng bahay si Cruz na nakasakay sa kanyang motorsiklo sa Barangay Talampas nang bigla nitong nilampasan ang isang traysikel ngunit nakawit ng gulong nito ang likurang bahagi ng motorsiklo ng biktima na naging dahilan upang mawalan ng kontrol ito at bumangga sa isang pasalubong na Toyota Fortuner.
Matulin namang tinatahak ni Fajardo sakay ng isang motorsiklo ang isang kurbadang daan sa Barangay Partida sa Norzagaray at dahil sa bilis ng sasakyan ay hindi na rin nakontrol ito at biglang bumuwal saka tumama sa isang bahagi ng gutter ng daan saka humampas pa ang ulo nito sa poste na naging dahilan upang mawalan ng malay ito.
Napagalaman din na kapwa walang suot na crash helmet ang dalawang biktima nang maaksidente. Boy Cruz