MANILA, Philippines - Niyanig ng pagsabog ang isang eskuwelahan at dalawang bahay makaraang magpaulan ng mga bala ng mortar ang mga armadong kalalakihan sa Barangay Poblacion sa bayan ng Ampatuan, Maguindanao kamakalawa ng madaling-araw. Sa report ni P/Senior Supt. Alex Lineses, naganap ang insidente dakong alas-4:40 ng madaling-araw. Nabatid na may anim na bala ng mortar ang pinawalan ng mga ’di-pa kilalang kalalakihan kung saan tatlong bala ang tumama sa dalawang kabahayan habang isa pa ang tumama naman sa eskuwelahan. Bagaman wala namang naiulat na nasugatan at nasawi ay lumikha ito ng matinding takot sa mga residente. Magugunita na noong Marso 21 ay dalawa-katao ang nasugatan sa mortar attack sa bahay ni Ampatuan acting Mayor Datu Zacaria Sangki. Joy Cantos