2 anak ng producer nasagip sa kidnappers

MANILA, Philippines - Sa loob lamang ng mahigit 24 oras, nailigtas ng pulisya ang dalawang anak ng isang television commercial producer sa kamay ng mga kidnapper sa Tagaytay City, Cavite makaraang magsagawa ng rescue operation sa Anti­polo City, Rizal nitong Bi­yer­nes ng umaga.

Batay sa ulat na ipi­na­rating kahapon sa tangga­pan ni Philippine National Police Chief Director General Jesus Verzosa mula kay P/CSupt Rolando Ano­nuevo, Regional Director ng Police Regional Office CALABARZON bandang alas-8:00 ng umaga ng Huwebes nang puwersa­hang tangayin ng mga kidnapper ang mga bikti­mang sina Christian Alex­an­der Joven, dalawang ta­ong gu­­lang, at Gilbert Jo­ven, walong buwang gu­lang na sanggol.

Nabatid na naganap ang pagdukot sa mga bik­tima sa Jestra Heights Subdivision, Sta. Rosa-Tagay­tay Road, Barangay Francisco, Tagaytay City.

Isinagawa ang rescue operation matapos mag­sumbong sa pulisya ang ama ng mga biktima na si Romeo Joven, 35, TV com­mercial producer at resi­dente ng Country Villa B, Unit Jestra Heights Subdivision, Sta Rosa-Tagaytay Road, Barangay Francisco.    

Agad namang nagsa­gawa ng rescue ang pinag­sanib na elemento ng Ca­vite Police at Antipolo City Police sa pinag­tata­guan ng mga suspek sa da­la­wang paslit sa Ba­rangay San Isi­dro, Bagong Nayon, Anti­polo City.

Nabatid sa salaysay ng ama ng mga biktima ng na­sabi ding araw na isina­gawa ang pagdukot sa mga biktima ay agad na ring humingi ang mga suspek ng P200,000 ransom ka­palit ng pagpapa­laya sa dalawang bata.

Sa sinagawang follow-up operation ng mga aw­toridad ay nadakip ang mga suspek na sina Bernard Lituañas at Rex Al­varez sa Brgy San Isidro, Bagong Nayon.