12 utas sa atake ng ASG/MILF

MANILA, Philippines - Aabot sa 12-sibilyan ang iniulat na nasawi ha­bang 10 iba pa ang nasu­gatan makaraang salaka­yin ng pinagsanib na pu­wersa ng mga bandidong Abu Sayyaf Group at Moro Islamic Liberation Front rouge elements ang maliit na komunidad sa Barangay Tubigan Proper, sa bayan ng Maluso, Basilan kaha­pon ng umaga.

Kabilang sa mga na­paslang ay sina Istilito Ba­cus, Benji Laping, Timhaar Arakani, Rodel alyas Uding Pagdalian, John Laping, Salima Salipuddin, Lorna Sahidda Salisa, Tawasil Idjiran, 50; Abigail Bucoy, 32; Arjie Bucoy, 9; Karen Bucoy, 1; at ang isang miyembro ng Cafgu na bineberipika pa ang pag­kikilanlan.

Si Abigail Bucoy at anak na si Karen ay kapwa na­sunog ang katawan at ma­ging si Salima Salipuddin matapos sunugin ang kani-kanilang bahay ng mga bandidong Abu Sayyaf.

Sugatan naman sina Kimberly Bucoy, 13; Talib Ibba, Sandy Taroza, Nonoy de la Cruz, Usman Assam, Joel Josefino, Maymuna Josefino, Jonathan Jose­fino, Jeron Josefino at si Ale­x­ander Bartolome.

Ayon kay Chief Lt. Gen. Ben Mohammad Dolorfino, ang paghahasik ng lagim ng mga bandido na pina­mu­munuan nina Abu Say­yaf kumander Furuji In­dama, Usman Alao, isang alyas Iradi at Dick Alao ay naganap may 9-oras mata­pos palayain ang bihag na dalawang Tsino na sina Michael Tan at Oscar Lu sa bayan ng Su­misip, Basilan.

Napag-alamang unang sinalakay nina Commander Indama at Dick Alao ang grupo nina Cafgu Active Auxiliary (CAA) Comman­der Laping, alyas Leleng sa­ka sinunog ang mga ba­hay nina Sandy Taroza, Ra­mon Castillo, Ariel La­ping at Sahayag Janang.

Lumilitaw sa imbes­tigasyon na si Dick Alao ay dating miyembro ng CAA’s na pinamumunuan ni Le­leng pero itiniwalag dahil sa pakikipagsabwatan sa mga bandido sa Basilan.

Sinasabing ang anak ni Alao ay napaslang sa eng­kuwentro ng grupo ni Le­leng noong Enero kaya ru­mesbak ang una kasama ang mga kasabwat na Abu Sayyaf at MILF rouge elements.

Kaugnay nito, bumuo na ng Task Force Tubigan upang siyasatin ang na­ganap na insidenbte kung saan ipinakalat na ang Army’s 32nd Infantry Battalion at 15th Division Re­coinnassance Company katuwang ang puwersa ng pulis-Basilan.