MANILA, Philippines - Animo’y biktima ng mga bandidong Abu Sayyaf ang isang 28-anyos na misis makaraang pugutan ng kanyang lover na umbagero dahil sa matinding selos, kamakalawa ng gabi sa bayan ng Dingalan, Aurora.
Sa phone interview, kinilala ni PO2 Rolando Orlasan ang misis na si Annie de los Santos habang nahaharap naman sa kasong murder ang suspek na si Lorenzo Flores, 44.
Sa inisyal na imbestigasyon ng pulisya, naganap ang krimen sa electronic shop sa Barangay Ibona, Dingalan bandang alas-11 ng gabi.
Ayon kay Orlasan, bigla na lamang sumugod sa electronic shop ang suspek na may bitbit na bagong hasang itak.
Narinig pa ng mga kapitbahay ang pag-aaway ng dalawa na pinaniniwalaang may kinalaman sa love triangle.
Kasunod nito, ay tinagpas ng suspek ang leeg ng biktima bunsod upang mapugot ang ulo nito na duguang tumalsik at gumulong pa sa semento ng electronic shop.
Ilang oras matapos ang krimen ay sumuko naman sa mga opisyal ng barangay ang suspek dala ang jungle bolo na ginamit sa krimen kung saan dinala naman sa kustodya ng pulisya.