KIDAPAWAN CITY , Philippines — Kamatayan ang sumalubong sa tatlong magsasaka makaraang ratratin ng mga ‘di-pa kilalang kalalakihan kamakalawa ng gabi sa Barangay Kana yahan sa bayan ng Carmen, North Cotabato.
Kinilala ni P/Insp. Winston Seniel, hepe ng Carmen PNP, ang mga nasawi na sina Hector Tomasis, 42; Norberto Feliciano, 57; at si Lyneth Camus, 49, pawang residente ng Purok 10, Barangay Poblacion sa bayan ng Carmen.
Sugatan naman ang mister ni Lyneth na si Adolfo Camus na tinamaan ng ligaw na bala sa paa at kamay kung saan nakaligtas din kay kamatayan ang misis ni Hector na si Elizabeth Tomasis.
Base sa police report, lumilitaw na nagpapahinga ang mga biktima sa farmhouse na pag-aari ng pamilya Camus nang maganap ang insidente.
Tinangay pa ang mga alagang hayop bago nag sitakas ang grupo patungo ng hangganan ng Barangay Katanayahan at Kibayao sa Malitubog-Maridagao Irrigation Dam na nasa Liguasan Marsh na sinasabing madalas pagtaguan ng mga rebeldeng Moro Islamic Liberation Front (MILF).