CAMP VICENTE LIM, Laguna, Philippines — Kalaboso ang binagsakan ng apo ni Comedy king Rodolfo “Dolphy” Quizon Jr. kamakalawa makaraang arestuhin ng pulisya dahil sa hindi pagdalo sa mga court hearing kaugnay sa mga kinakaharap nitong kasong droga sa bayan ng Sta. Cruz, Laguna.
Ayon kay P/Supt. Marvin Saro, hepe ang Sta. Cruz PNP, nadakip si Rocky “Rocco” Quizon III, 22, ng Barangay Talabis Compound, Barangay Bagumbayan sa bisa ng warrant of arrest na ipinalabas ni Judge Jaime Blancaflor ng Sta. Cruz Regional Trial Court Branch 27.
Dinakip si Quizon III habang nasa loob ng Argem Cockpit Arena sa Barangay Bubukal, Sta Cruz, Laguna bandang alas-3:15 ng hapon.
“Hindi namin hawak ‘yung case folder n’ya pero ayon sa kanya (Quizon III) posibleng may kaugnayan ito sa kaso niyang illegal possession of drugs limang taon na ang nakalipas,” ani Saro.
Pinaniniwalaang nag-isyu ng warrant of arrest ang korte nang hindi makadalo sa mga court hearing si Quizon III o di-kaya ay napaso na ang kanyang bail bond.
Kasalukuyang nakapiit si Quizon III sa himpilan ng pulisya sa Sta Cruz habang inirekomenda ng korte ang P.2 milyong bail bond para sa kanyang pansamantalang kalayaan.
Sa tala ng pulisya, nahaharap din si Quizon III sa kasong attempted murder matapos barilin nito ang kanyang kaibigang si Jomar Paghangaan sa Laguna noong April 2009 nang ipagtanggol n’ya ang kapatid na si Rodolfo Quizon III. Arnell Ozaeta