31 preso itinakas ng MILF

MANILA, Philippines - May 31 preso kabilang ang dalawang mataas na opisyal ng Moro Islamic Liberation Front ang naka­takas makaraang lusubin ng may 30 miyembro ng MILF ang Basilan Provincial Jail sa Isabela City ka­hapon ng madaling-araw.

Ayon sa ulat ng Basilan Provincial Police Office, sa na­turang paglusob ay isang jail guard at isang tagalabas ang nasawi sa sagupaan na tumagal ng halos 10 minuto.

Sa inisyal na ulat ni Senior Supt. Rolando Purru­ga­nan, ganap na ala-1:45 ng madaling-araw nang lusubin ng armadong grupo ang bilangguan sa may Sumagdang, Isabela City.

Nagkasagupaan ang mga jail guard at rebelde na hinihinalang mula sa 114th base command ng MILF hanggang sa mangi­babaw ang puwersa ng huli at mapasok ang piitan sa pamamagitan ng pagsira sa mga kandado ng rehas gamit ang bolt cutter.

Sinasabing kasama sa mga nakapuga ay ang mga MILF commander na sina Dan Laksaw at Kamsa Li­maya na nakabase umano sa Al-Barka sa bayan ng Basilan. Sila Laksaw at Limaya ay itinuturing na “high profile” na bilanggo na miyem­bro ng 114th base command ng MILF. Ang mga ito rin ang umano’y kabilang sa na­mu­got sa 10 sundalo ng Philippine Marines noong Hulyo 2007.