Truck bumaligtad, 8 todas

BAYOMBONG, Nueva Vizcaya , Philippines  – Walong katao ang kinarit ni kamatayan habang dalawang iba pa ang suga­tan nang bumaligtad ang kanilang sinasakyang truck kahapon ng umaga sa Ba­rangay Tayabo, San Jose City, Nueva Ecija.    

Kinilala ng pulisya ang anim sa walong nasawi na sina Salvador Pacillo ng Pantaba­ngan; Romeo Ortiz; Narciso Ortiz; Renato Villa­nueva; at Jerry Gaspar, kapwa mga residente ng Santa Monica, Rizal; at Fidel Ayap ng Santo Niño 3, San Jose City na pa­wang nasa naturang lalawi­gan.     

Nakilala naman ang dala­wang nakaligtas at nasuga­tang sina Glorioso Tobias, 32, residente ng Zone 9, Barangay Tayabo at Ruben Villanueva, 23, ng Santa Monica.     

Ayon kay Insp. Apolinario Agustin, Deputy Chief of Police for operation ng San Jose City Police Office, dakong alas-8:45 ng umaga nang bumalig­tad ang 10 wheeler truck (RGT 432) na minamaneho ni Tobias sa pababang bahagi ng national highway sa Barangay Tayabo.     

Galing umano ang truck lulan ang mga biktima mula sa Tabuk, Kalinga karga ang humigit kumulang sa 400 kaban na palay na kanilang binili sa Codillera subalit, pag­dating sa tulay ng Ba­rangay Tayabo, napansin ng driver na nawalan ng preno ang kani­lang truck hang­gang sa tulu­yan na itong bumaligtad.   

 “Ligtas sina Tobias at Villa­nueva pero ang walong iba pa nilang kasamahan na kara­mihan ay nakasakay sa liku­rang bahagi ng truck ang siyang sinawing palad,” pahayag ni Agustin. Ba­gama’t isinalaysay ng driver na si Tobias ang da­hilan ng aksidente ay inihayag ni Agustin na nagsasagawa pa rin sila ng masusing imbes­tigasyon sa pangyayari.