Camp Simeon Ola , Legazpi City , Philippines – Nagpatayan ang dalawang mister na matagal ng may alitan matapos na magduwelo ang mga ito ng magkasalubong sa daan sa Sitio Canogan, Barangay Laurente, San Pascual, Masbate kahapon ng umaga.
Kinilala ang dalawa na sina Alexander Azul 66, may asawa, Municipal Civil Registrar at Jose Villarba, 42, magsasaka at kapwa mga residente ng naturang lugar.
Ang insidente ay naganap dakong alas-8:20 ng umaga kung saan kapwa pupunta na sa kani-kanilang mga trabaho sina Azul at Villarba ng magkasalubong. Dito ay agad na sinaksak ni Azul si Villarba ngunit mabilis din nakabunot ng baril ang huli. Makalipas ang ilang segundo ay parehas na bumulagta ang mga ito sa lupa. Narekober ng pulisya ang itak at kal 38 na ginamit ng dalawa sa pagpapatayan.
Sa impormasyon, malalim na alitan ang ugat ng pagduduwelo ng dalawa at maging ang pamilya ng mga ito ay nadamay na rin sa gulo. Sa ngayon ay isinasailalim sa awtopsiya ang bangkay ng mga ito. (Ed Casulla)