LTO offc'l, utol utas sa ambus

MANILA, Philippines - Pinaniniwalaang aga­wan sa puwesto ang isa sa motibo kaya tinambangan at napatay ang isang opis­yal ng lokal na sangay ng Land Transportation Office at kapatid nito ng mga di-pa kilalang kalalakihan sa panibagong karahasang naganap kahapon ng uma­ga sa highway ng bayan ng Tubod, Lanao del Norte.

Kinilala ni P/Senior Supt. Bernardo Reamon, ku­mander ng task force, ang magkapatid na sina Alejandro “Ali” Datuma­nong, deputy director ng Land Transportation Office sa Iligan City at Akrab Datumanong.

Nabatid na si Ali ay sina­sabing isa sa dalawang aplikante sa pagka-hepe ng LTO sa Iligan City su­balit iba ang napipisil na maging director ng LTO Region 10.

Sinasabing umapela pa sa tanggapan ni Lomibao si Ali na siya ang dapat na mailagay sa posisyon bi­lang hepe ng LTO ng Ili­gan City dahil siya ang kuwalipikado sa posisyon bilang Traffic Regulation Officer 2 sa nabanggit na ahensya.

Gayon pa man, walang sinuman sa dalawang ap­likante sa posisyon ang nailagay na hepe ng LTO kundi si Monching Ma­ngudato na sinasabing may koneksyon sa ilang opisyal ng pamahalaan.

Sa phone interview, si­nabi ni Reamon na naga­nap ang pananambang sa kahabaan ng highway ng Alcuizar Avenue, Baraas, bandang alas-8:15 ng umaga.

Napag-alamang patu­ngo na sana sa opisina ang mag-utol na lulan ng Isuzu Crosswind nang dikitan at pagbabarilin ng motorcycle-riding gunmen.

Sa nasabing pag-atake ay nadamay ang kapatid ni Ali na si Akrab na tuma­tayong drayber ng sa­sakyan.

Naisugod pa sa Dr. Uy Hospital pero namatay din habang ginagamot.

Nakipag-ugnayan na rin si LTO chief Arturo Lu­mi­bao sa PNP at sa NBI Ili­gan City para mabilis na ma­bigyang linaw ang na­ganap na pamamaslang kay Datumanong.