MANILA, Philippines - May 10 katao ang nasakote ng pinagsanib na elemento ng Special Operations Task Force at ng Anti-Illegal Drug Special Operations Task Group ng pulisya sa pagsalakay sa isang shabu drug den sa Bacolod City kamakalawa ng gabi.
Sa nasabing operasyon, bandang alas-7:00 ng gabi sa Purok Kagaykay, Barangay 2, Bacolod City, nadakip ang itinuturong maintainer ng drug den na si Dalin Antiporda, 42 anyos.
Kabilang pa sa mga nasakote ay ang mga kataong nasa bisinidad ng lugar na natiyempuhan sa drug den na sina Louie Lim, Raul Rona; pawang mga call center agents.
Ang iba pa ay sina Liezl Largo, 19; Jomar Villar, 19; John Medel, Joebert dela Cruz, Celeste Panaligan, Raffy Beltran, 34-anyos at isang 16-anyos na estudyante sa isang eskuwelahang Katoliko na naaktuhan sa pot session.
Nasamsam naman mula sa mga ito ang tatlong sachets ng shabu, P7,800 cash, Nissan March vehicle, solvent at iba pa. (Joy Cantos)