Angat Dam nakaambang gumuho

BULACAN, Philippines – Ibinunyag kahapon ni Director Renato Solidum ng Philippine Institute of Volcanology na ang west valley fault o lamat na isang aktibong fault ay tuma­tagos sa Angat Dam reservoir na may 350 hanggang 400 me­tro sa east ng main dike.

Sa pagdinig ng Sanggu­niang Panglalawigan ng Bula­can na ang pinuno ay si Bula­can Vice Governor Wil­he­mino Sy Alvarado kung saan sinabi ni Solidum na ang posibleng pinakamala­lang mangyayari ay sakaling lumindol ng magnitude 7.2 na maaaring maka­apekto sa Angat Dam.

Kaya naman nanawagan sina Solidum at Alvarado sa pamahalaan na magsagawa ng agarang pag-aaral sa epekto ng lindol sa katata­gan ng Angat Dam.

Nauna rito, nanawagan si Alvarado kay Pangulong Arroyo at sa mga kinauukulang ahensya ng pamahalaan na siyasatin ang katatagan ng dam kaugnay ng mga pahi­watig na ulat mula sa MWSS na ito ay hindi na gaanong matatag at kasama pa sa Mari­kina fault line area.

Nanawagan din ang bise gobernador sa lahat na ihin­to na ang mga debate hinggil dito at magkaisa sa pagha­rap sa pro­ blema matapos kum­pirma­hin ng PHILVOCS na tumagos dito ang west valley fault o lamat.

Nagpahayag ng pa­ngam­ba si Alvarado sa sunud-sunod na lindol kamakailan na yuma­nig sa Mindoro at ilang panig ng Metro Manila na maaring makaapekto sa Angat Dam.

Samantala, ikinabahala din ni Alvarado ang mga ulat na pag­sasapribado ng Angat Dam na pinagkukunan ng 96 porsiyentong suplay ng tubig sa Metro Manila dahil tiyak na maaapektuhan ang mga mag­sasaka na umaasa ng tubig sa kanilang pagsasaka. Boy Cruz