MANILA, Philippines - Pinagbabaril hanggang sa mapatay ang isang hukom ng Shariah court ng dalawang ‘di-pa nakilalang kalalakihan sa naganap na ambus sa bayan ng Patikul, Sulu kahapon ng hapon.
Napuruhan ng bala ng baril si Edimer Gumbahali, 37, Shariah Municipal Trial Court judge sa nasabing lalawigan.
Ang Shariah court ay isang espesyal na korte na humahawak sa mga isyung legal sa ilalim ng batas ng Islamic.
Sa report na ipinarating kahapon ni Autonomous Region in Muslim Mindanao director P/Chief Supt. Bensali Jabarani, naganap ang pananambang sa bisinidad ng Brgy. Bangkal, Patikul bandang alas-4 ng hapon.
Base sa police report, lulan ng motorsiklo si Gumbahali, nang dikitan at ratratin ng motorcycle-riding gunmen kung saan patuloy naman ang imbestigasyon ng pulisya. Joy Cantos