CAMP VICENTE LIM, Laguna — Dalawang kalalakihan na sinasabing notoryus na holdaper at sangkot sa holdap ng payroll sa Calamba City kung saan napatay ang finance officer ng pulisya ang iniulat na napaslang makaraang makipagbarilan sa mga alagad ng batas sa bayan ng Bay, Laguna kahapon ng madaling-araw.
Isa sa dalawa na napatay ay si Meliton Gatdula, miyembro ng Sputnik Gang at Malacaman Group na sinasabing notoryus na nag-ooperate sa Southern Tagalog.
Sa ulat na nakarating kay P/Chief Supt. Perfecto Palad, lulan nang motorsiklo ang dalawa nang parahin ng pulisya sa checkpoint sa Los Baños, Laguna dahil sa walang plaka ang kanilang sasakyan.
Imbes na huminto, umiwas pa ang dalawa sa checkpoint at pinaharurot ang motorsiklo patungo sa bayan ng Bay, Laguna.
Dito na nagkahabulan hanggang sa masukol ang dalawa sa may Sitio Sampalucan, Brgy. Masaya kung saan naganap ang shootout.
Pinaniniwalaang sangkot ang dalawa sa P2.2-milyong payroll holdap kung saan napatay ang finance officer ng Mimaropa PNP na si P/Senior Insp. Ludivina de Luna Guinali noong April 22. Arnell Ozaeta at Joy Cantos