MANILA, Philippines - Napaaga ang salubong ni kamatayan sa tatlong sibilyan makaraang mahulog ang truck na kanilang sinasakyan sa malalim na bangin sa Brgy. Tikala, Manolo Fortich, Bukidnon.
Sa police report na nakarating sa Camp Crame, kabilang sa mga nasawi ay sina Rodrigo Ditumal, Carmelita Aseñero at si Bibing Colfranco na pawang nakatira sa nasabing lalawigan.
Ayon kay PO2 Gary Villanueva, naganap ang trahedya pasado alas-9 ng gabi kamakalawa habang sakay ng hauler truck na minamaneho ni Amay Espinosa, ang 50 manggagawa ng Del Monte Phils. na kinabibilangan ng mga biktima.
Nabatid sa ulat na nasiraan ng makina ang hauler truck kaya nawalan ng kontrol sa manibela si Espinosa kaya nagtuluy-tuloy sa bangin.
Naipit ang tatlo sa loob ng truck habang nagtamo naman ng maraming sugat ang iba pang manggagawa kung saan naisugod naman sa ospital.
Patuloy naman ang imbestigasyon ng pulisya habang inihahanda ang kasong isasampa laban sa drayber. (Ricky Tulipat)