Killer ng ex-mayor kinasuhan
CAMP VICENTE LIM, Laguna , Philippines – Sinampahan na ng kasong murder ang isa sa dalawang suspek sa pamamaslang kay ex-Candelaria Mayor David Emralino makaraang maaresto sa Batangas City noong Linggo.
Kinilala ni P/Senior Supt. Elmo Francis Sarona, Quezon police director, ang suspek na si Adorico De Sagun Ebora, 38, ng Brgy. Libato, San Juan, Batangas.
Naaresto si Ebora ng Task Group Emralino sa bisinidad ng Brgy. Sampaga, matapos inguso ng mga saksi na siyang pangunahing bumaril kay Mayor Emralino sa harap mismo ng San Pedro Bautista Parish Church sa Candelaria, Quezon noong Hulyo 26.
“May mga dating kaso si Ebora kaya lang nakalaya siya matapos hindi na itinuloy ng complainant ang kaso laban sa kanya,” ani Sarona matapos kumpirmahing isang gun-for-hire si Ebora.
Ang dalawang bodyguard ni Emralino na sina Freddie Acebron at Ramil Casilag ay sugatan din at kasalukuyang nagpapagamot sa ospital sa Lucena City. Kasalukuyan pa ring inaalam ang motibo sa pamamaslang habang patuloy pa rin ang pagtugis sa iba pang suspek. (Arnell Ozaeta)
- Latest
- Trending
